Imaxe da exposición no Etnolóxico de Ribadavia. Fonte: Festival Arteficial
Co título As historias da música gravada, o Museo Etnolóxico de Ribadavia abría este 6 de setembro unha nova exposición centrada na evolución dos rexistros sonoros no noso país. A proposta, coordinada polo festival Arteficial e a Escola Sinsal, convida ao público a explorar esta historia a través de oito figuras clave mediante o uso da banda deseñada.
O proxecto abrangue un período que vai do século XVIII ao XX a través de medio cento de pezas que inclúen material sonoro, libros, revistas, reprodutores MP3, discos de vinilo de 7'' e 12', soportes fonográficos, xogos de mesa, xoguetes, máquinas de ditado portátiles, casetes, discos, postais ou selos.
Como eixe da mostra percórrese o traballo de Martínez de Presa, Severino Pérez Vázquez, Andrés Avelino Comerma i Batalla, Emilia Pardo Bazán, Enrique Labarta Pose, Maruja Boga, Pedro Ferrer e Portela Seijo. As historias destes persoeiros son interpretadas en cadriños polas creadoras e creadores Emma Roulette, Begoña García - Alén González, Marta Cartu, Santi Zubizarreta, Pepa Prieto Puy, Andrés Magán, Rapapawn (Cynthia Alfonso e Óscar Raña) e Mar Mascaró.
Propostas curiosas como o traballo de Domingo Martínez de Presa cos seus autómatas ou o primitivo sintetizador de voz que desenvolveu Severino Pérez Vázquez a finais do século XIX en Pontevedra fan parte deste proxecto.
