Os campamentos romanos da provincia da Coruña foron construídos ao redor de fortificacións da Idade do Ferro

Os campamentos romanos da provincia da Coruña foron construídos ao redor de fortificacións da Idade do Ferro. Esta é unha das conclusións científicas do proxecto Finis Terrae, a iniciativa do colectivo de investigación romanarmy.eu para investigar dous recintos militares romanos descubertos recentemente na provincia da Coruña, o campamento romano de Santa Baia (A Laracha) e o recinto fortificado de O Castrillón (Touro). A través das sondaxes arqueolóxicas, os arqueólogos puideron determinar que os campamentos foron construídos e abandonados con rapidez, e que empregaron sitios arqueolóxicos fortificados da Idade do Ferro. No caso de Santa Baia, coñecíase a existencia dun castro na zona superior do outeiro. As analíticas puideron datar a muralla na primeira Idade do Ferro (séculos VI-III a.C.) e as sondaxes suxiren que o castro podería estar xa abandonado no tempo no que os romanos chegaron ao recinto. Pola súa banda, a fortificación de O Castrillón tamén contaba con dous recintos: unha pequena acrópole e un recinto alongado aproveitado a dorsal dun outeiro. As analíticas tamén permitiron determinar dúas fases no xacemento, identificando que o recinto superior foi tamén construído na Idade do Ferro, ao redor do século V-IV a.C., mentres que o máis amplo recinto inferior foi construído con posterioridade en época romana. A investigación, que contou co apoio da área de Patrimonio da Deputación da Coruña, integrou o desenvolvemento de produtos divulgativos no proceso mesmo de investigación, producindo ilustracións, recreacións tridimensionais dos xacementos a partir dos datos investigadores e mesmo un podcast para acceder aos resultados. No interior da noticia podes ver as recreacións elaborada polo Centro Infográfico Avanzado de Galiza para o proxecto. Os resultados foron presentados polo coordinador do proxecto Finis terrae, o profesor da Universidade de Salamanca José Manuel Costa García, e por Xosé Luis Penas, deputado de Patrimonio da Deputación da Coruña.

Castro e campamento romano de Santa Baia (A Laracha)




Castro do Coto de San Sebastián e recinto fortificado de O Castrillón