Localizan un sistema de canalización tardoantigo que alimentaba os obradoiros do castro de Valencia do Sil

Na nova campaña levada a cabo no castro de Valencia do Sil (Vilamartín de Valdeorras), o equipo arqueolóxico de Sputnik Labrego localizou un importante sistema de canalización de agua destinado ao uso dun forno, posiblemente unha forxa de ferro ou cobre. De acordo cos investigadores, "trataríase dunha das estruturas de produción metalúrxica de época tardorromana máis grandes escavadas no noroeste peninsular. A auga sería previsiblemente tomada da zona superior da ladeira e alimentaría "unha ou dúas forxas" vinculadas a este asentamento tardoantigo. A vinculación posible cunha zona metalúrxica tamén cobra consistencia co achado dunha peza excepcional: un pico-pala en bo estado de conservación que, nunha interpretación aínda provisional, o director da intervención, o profesor Carlos Tejerizo, indica como un posible útil mineiro. O castro de Valencia do Sil tivo unha ocupación entre os séculos IV e VI d.C., no periodo do final do Imperio Romano e o reino suevo, e está moi vinculado ás comunicacións desta importante zona de saída da Galicia actual.


Pico-azada localizado no castro de Valencia do Sil. Foto: Sputnik Labrego