![](imaxes/edicion/beiramar_xente_roteiro_2024_2.jpg)
Como actividade de presentación, a entidade convoca para o vindeiro 16 de xuño un roteiro reivindicativo que percorrerá algún dos fitos e elementos máis representativos dese patrimonio pola costa olívica. Ademais de coñecer estes espazos, durante o percurso colocaranse placas informativas nalgúns dos inmobles máis destacados do percorrido, como as instalacións de Alfageme, Cardama, Cerqueira, Barreras, Fribesa ou Frigodis a explicar a historia destas industrias.
O evento contará coa guía de integrantes de Amigas das Árbores, Anxo Vila (A. V. Curva de San Gregorio), David Amoedo (Tranvías Eléctricos de Vigo e As da Industria), Mariña López (Museo da Conserva) e Puri Pérez Leiros (Bouzas olladas salgadas).
A entidade reclama a recuperación das construcións localizadas no polígono de Beiramar-Jacinto Benavente, creado nos anos 50 e que albergou empresas pioneiras como Pescanova, FribesaFriVigo, Frigodis, Molagón, Freiremar, Flex ou Pescapuerta, que revolucionaron a pesca de altura e o emprego do frío industrial nesta actividade.
Boa parte destas industrias deixaron no lugar instalacións que, segundo Beiramar da Xente "supuxeron a entrada das novas formas das vangardas e do movemento moderno na arquitectura industrial da cidade, presentando características propias como conxunto, como son as plantas baixas de bloque de pedra ou a construción en altura".
A entidade reivindica a recuperación destes espazos a harmonizar o seu uso público co desenvolvemento de espazos residenciais. Centros culturais, a nova biblioteca estatal, prazas públicas ou locais de ensaio para música e artes escénicas son algunhas das propostas que a plataforma reúne no seu web.
![Mapa do patrimonio industrial de Bouzas, o Areal de Coia e Beiramar. Fonte: Beiramar da Xente](/imaxes/edicion/mapa_patrimonio_industrial_beiramar_vigo.jpg)