No álbum poden ouvirse tamén os Maitines de Montemaior, tema que representa unha forma particular de cantos propia da comarca de Bergantiños. O romance Caminiño, caminiño e mais as Coplas de Nadal de Soutoxuste, gravadas por Alan Lomax en 1952, completan esta colección de temas.
Cada unha das pezas conta con información de contexto sobre a súa orixe e recollida ademais de incluír a letra. A edición física do álbum, pola súa banda, inclúe versións en karaoke para facilitar a súa interpretación a domicilio nestas festas.
Na súa aproximación a este patrimonio, Ailá aposta por un coro de voces masculinas e femininas ás que acompaña unha instrumentación complexa que aposta por unha percusión suave para xerar un ambiente propio destas celebracións.
A formación habitual de Ailá, Ángela Carou (voz e percusión), Manuele Pardo (voz, percusións e gaita), Abel Gañete (trompeta e fliscorno) e Xan Pampín (acordeón, bombo e pianos) corren coas interpretacións desta proposta. Canda a eles, o grupo contou con colaboracións como as voces de Antía Vazquez e máis Uxía e Andreas Cabanas canda ás interpretacións de Pedro Pascual en mandolina, guitarras ou bouzuki. O grupo xa presentara en 2021 un EP con tres panxoliñas baixo o mesmo título.