ButacaZero estrea o seu Iribarne en Madrid

Este 12 de outubro, a coincidir co Día da Hispanidade, a compañía ButacaZero estrea no Teatro Valle Inclán de Madrid Iribarne. Esta produción retrata a figura de Manuel Fraga con texto de Esther F. Carrodeguas e dirección de Xavier Castiñeiras nunha montaxe que se prolonga durante tres horas.

Xurxo Cortázar, Jorge de Arcos, Esther F. Carrodeguas, Mónica García, Anxo Outumuro e Lidia Veiga porán sobre escena este proxecto, que, segundo aclara a compañía "NON é un biopic sobre Manuel Fraga. Teríanos encantado facelo... pero non collía nunha soa obra!". Para ButacaZero Iribarne propón "unha investigación escénica sobre unha desas figuras absolutamente imprescindibles do noso pasado recente. Un intento (irreverente) por comprender como chegamos até aquí da man dun político que, nas súas propias palabras, dicía as verdades sen condón".

A obra preséntase como unha "radiografía en clave de humor" da figura protagonista e "do seu papel na recente historia de España". A proposta vertébrase en tres episodios que reflicten a evolución política do Estado desde o Franquismo, a Transición e a Democracia para culminar co período de hexemonía de Fraga en Galicia. Iconas como Salomé, Massiel ou Serrat, e momentos históricos como Palomares, os asasinatos de ETA ou a morte de Franco atópanse sobre as táboas no que a Carrodeguas define como "o traballo máis difícil que escribín ata o de agora", e que o director reivindica como "unha peza extremadamente divertida, moi tola, moi teatral de ver". Berto correu coa trilla sonora da obra, que será editada por Subterfuge Records.

O proxecto, que se manterá un mes no escenario madrileño, é unha coprodución do Centro Dramático Nacional, ButacaZero e a Mostra Internacional de Teatro (MIT) de Ribadavia, co apoio da Axencia Galega das Industrias Culturais. Esther F. Carrodeguas desenvolveu o texto no marco do programa Cruces de Camiño Escena Norte, da Residencia Mariñán e da Residencia de escritura da Sala Beckett 2023.