A Deputación de Pontevedra pon na rede o documental Acorda

Logo da estrea, o pasado 20 de xuño, de Acordamos, o seu segundo documental sobre os lugares da memoria histórica na provincia, a Deputación de Pontevedra publicou na rede Acorda, a primeira produción desta serie audiovisual. O proxecto, que botou a andar en 2021, achega unha serie de actuacións musicais en espazos vencellados á represión franquista combinadas con memorias daqueles feitos.

A peza que chega agora á rede, con guión de Lois Pérez e dirixido por Uxía e Marina Carracedo, conta con actuacións de Emilio Rúa e Silvia Penide, Ugia Pedreira e Marina Oural, Sheila Patricia, Eladio Santos, Tanxugueiras, Ezetaerre, a propia Uxía e Su Garrido. Canda á música, o proxecto recolle dramatizacións a cargo de Tero Rodríguez, Andrés Giráldez ou Eduardo R. Cunha Tatán ademais testemuñas da represión. O documental conta tamén cunha edición en libro-DVD no que tamén participan a escritora Montse Fajardo e a fotógrafa Alba Díaz.

En canto a espazos, o documental percorre a antiga Escola Normal en Pontevedra; a Ponte Regueiro da Estrada; o Pozo da Revolta, en Marín; a praia de Massó en Cangas; a praia de Alcabre (Vigo); a Bombardeira ou Volta dos nove (Baredo); a Volta da Moura; e finalmente a Illa de San Simón.

A segunda peza da serie, Acordamos, que aínda non chegou á rede, combina de novo familiares de persoas represaliadas e nomes da investigación neste ámbito con cancións de Uxía, Quilma e As Divinas, Malvela, Celina da Piedade e Ana Santos, Wöyza e María Faltri, Antía Muíño e Luis Pastor, Treixadura e Sondarúa. Este documental repasa os acontecementos deste período que se desenvolveron en Sobredo, Moaña, Lérez, a Illa de Arousa, Tomiño e Xiabre.