O fallo salienta que o poema de Nogueira "profunda no universo poético que a autora propón na súa obra Antese. Aquí, a poeta asume o papel de filla para falar da súa nai e faino cunha cadencia entre o cotián e o puramente metafórico". O traballo de Fidalgo, pola súa banda, "parece unha colección de anhelos que xorden dun condicionante que a autora pon encima da mesa coa intención de facer voar a súa imaxinación, ou quizais a súa memoria, até o centro da paixón que esperta o contacto humano".
O pasado 29 de marzo, a organización dera a coñecer o fallo da categoría musical, que foi para II. LISÍSTRATA (varre vasoira), das Fillas de Cassandra como mellor tema galego. O fallo salienta que "este segundo corte do que é o primeiro traballo das viguesas María Pérez e Sara Faro dá boa conta de que a escena musical galega segue a innovar e triunfar sen necesidade de abandonar a tradición cultural, reformulando a mensaxe feminista a través dun espazo no que a Grecia Clásica convive co trap ou a música electrónica".
No ámbito portugués, a mellor música de 2022 foi Maçãzinha, da agrupación portuense Retimbrar en colaboración coa mosense Uxía. O tema "é un bo exemplo do TugaBeat, nome co que os mesmos Retimbrar definen a súa música, unha mistura de sons folk, populares e de outras moitas orixes coa sempre imperante presencia da percusión tradicional lusa".
A organización do certame, ademais, outorgoulle o Premio Especial do Xurado á Embaixada da Amizade Galego-Lusófona 2022 á Associação José Afonso. Este recoñecemento "pretende salientar o traballo daquelas persoas, institucións, organismos ou iniciativas que destacaron por crear pontes de amizade, afectos e colaboración entre Galiza e Portugal a prol da nosa cultura e lingua común galego-portuguesa". A asociación, nada en 1987, traballa "por manter vivo o legado daquel que non só foi un dos maiores cantores e poetas da historia de Portugal, senón tamén un persoeiro sempre consciente das súas ligazóns, e as do pobo portugués, coa Galiza", e conta cunha delegación no noso país.
As propostas gañadores selecciónanse por votación en liña entre unha listaxe de dez candidaturas por categoría propostas polo alumnado e o persoal docente dos centros que colaboran nesta iniciativa. A entrega dos galardóns realizarase o vindeiro mes de outubro nunha gala que se celebrará no Auditorio de Galicia en Santiago de Compostela.
