Unha das pezas de referencia da dramaturxia universal, escrita polo noruegués Henrik Ibsen en 1882 chega ás táboas galegas da man de Talía Teatro, que adapta o texto, colocando unha muller como protagonista en "Unha inimiga do pobo". Este venres, 3 de marzo, o teatro Rosalía de Castro da Coruña acolle a estrea e as primeiras representación (sábado, 4) desta montaxe baixo dirección de Tito Asorey, que tamén foi quen adaptou o texto xunto a Vanesa Sotelo. Marta Lado protagoniza o espectáculo, no papel de Helena, unha doutora de prestixio internacional que regresa á vila natal para comezar unha nova etapa xunto ao seu compañeiro. Embarazada de cinco meses, afronta o seu novo estado coa ilusión por un novo proxecto profesional co balneario que ela mesma deseñou e que se presenta como un alternativa turística sostible e saudable. A inesperada contaminación das augas da zona e a súa loita por preservar a saúde da poboación fronte aos intereses económicos van colocala no punto de mira da veciñanza que ve como se pon en risco a prosperidade para toda a comunidade. Completan o reparto Toño Casais, Dani Trillo, Rubén Prieto, Marta Ríos, María Ordóñez, Diego Rey, Artur Trillo e Xurxo Barcala.
Co teatro social de "Unha inimiga do pobo" denuncia Ibsen unha forma de facer política que antepón os beneficios económicos sobre a saúde da poboación, ao tempo que permite reflexionar sobre o poder dos medios de comunicación á hora de moldear a opinión pública e colocala no lugar no que ao poder lle interesa. Desde a compañía sinálase a "rabiosa actualidade do texto", probada, segundo eles ao descubrir como os problemas incipientes que o protagonista afrontaba no século XIX volvéronse máis profundos e daniños no século XXI. Así, coa vontade de aproximar aínda máis a peza, a Galicia actual serve de escenario para esta proposta onde a desinformación, os riscos das maiorías absolutas, a crise ecolóxica e a depredación neoliberal deseñan un contexto hostil no que as emocións humanas son sometidas á máxima presión. Talía afirma querer converter o teatro nun foro "onde poidamos ollarnos como sociedade e vernos reflectidos coas nosas contradicións e problemáticas". O espectáculo xa ten datas confirmandas da súa xira que seguirá en Carballo, Vimianzo, Cee, Ourense, Lugo e Betanzos, polo de agora.
