A sede da Fundación Vicente Risco en Allariz acolleu este 15 de novembro a presentación do traballo gañador do X Premio de Novela Curta Antón Risco. Reflorestação do portugués Nuno Ricardo Moreira Gonçalves chega ás librarías da man da propia Fundación na colección Doutor Alveiros.
O fallo do certame, que se produciu o pasado mes de xullo, valeulle a Gonçalves facerse cos 3.000 euros en metálico do premio. O xurado estivo composto por Francisco Javier Fernández Davila, Concepción Fernández Vázquez, Jonathan Pérez Pérez e mais Purificación Araújo Quinteiro e Luís González Tosar, que actuaron por delegación, con Ana Gloria Rodríguez Alonso como secretaria sen voto.
Segundo apuntou a Fundación Risco, o comité valorou "a calidade literaria do texto, cunha temática de corte fantástico e actual que convida á reflexión. Subliñouse tamén o bo tratamento narrativo, o enfoque da obra e o uso equilibrado do humor". A obra propón unha distopía no que as árbores comezan a medrar no medio das cidades e reclaman o territorio ocupado pola humanidade.
