Unha nova roda prehistórica en Cereixa

Os peculiares círculos prehistóricos, descubertos para a arqueoloxía galega hai poucos anos, comezan a ser xa espazos familiares para o público en Galicia. Unha nova investigación anunciada onte abordará a intervención arqueolóxica noutro destes monumentos. O equipo científico que está a traballar na parroquia de Cereixa (A Pobra do Brollón, Lugo) e que recentemente avanzou os resultados dun cairn prehistórico no sitio da Muradella (fronteirizo entre este concello e Monforte de Lemos) anunciou onte os inicios do proceso de investigación do círculo prehistórico de Vilarello. Trátase dunha nova rodela de 65 metros de diámetro, en "excelente" estado de conservación, que será posiblemente intervida este verán. O recinto está delimitado por un parapeto de terra e a súa singularidade radica en que no seu interior apareceron materiais moi diversos en superficie, desde unha posible ferramenta pulimentada ata escouras e fragmentos de mineral. Este aspecto é relevante porque ata o momento neste tipo de rodas ou 'henges' non foron atestemuñadas actividades metalúrxicas. Atópase, ademais, nunha encrucillada importante de camiños históricos. A intervención, dirixida polo arqueólogo da Universidad Complutense de Madrid Rodrigo Paulos Bravo, e asesorada polo arqueólogo da Universidade Nova de Lisboa Xurxo Ayán, tentará determinar a funcionalidade e cronoloxía deste recinto.

o círculo prehistórico de Vilarello