As editoriais galegas preséntanse en LIBER

A Asociación Galega de Editoras participa desde hoxe na Feira Internacional do Libro LIBER, que se celebra ata 7 de outubro, en Barcelona. A AGE conta cun espazo propio, posto a disposición das editoriais asociadas desprazadas á feira para desenvolver a súa axenda de traballo e presentar unha selección de novidades e do seu fondo bibliográfico: Hércules de Ediciones, Edicións Positivas, Alvarellos Editora, Kalandraka, Baía Edicións, Editorial Galaxia, Xerais, Ediciones del Viento, Triqueta Verde, Edicións do Cumio, Edicións Embora, Editorial Bululú, Tulipa Editora. Recoñecida nestes 40 anos como unha das principais citas feirais para a edición en español, LIBER reúne a máis de 350 editoriais e empresas que darán a coñecer os seus fondos bibliográficos e novidades, así como produtos e servizos relacionados coa comercialización e distribución de libros.

A Asociación Galega de Editoras distribuirá no seu espazo exemplares do catálogo para venda de dereitos que deseñou para levar á feira internacional do libro de Frankfurt, e xa está dispoñible para a súa consulta no perfil de expositor da AGE na LIBER. Conta cunha selección de títulos de libro ilustrado, literatura para adultos, cómic, LIX, ensaio, teatro e poesía das editoriais: Hércules de Ediciones, Edicións Positivas, Alvarellos Editora, Kalandraka, Baía Edicións, Editorial Galaxia, Xerais, Ediciones del Viento, Triqueta Verde, Edicións do Cumio, Edicións Embora e Editorial Bululú. No programa de actividades da feira barcelonesa tomarán parte a tradutora María Alonso Seisdedos e Xosé Ballesteros, director de Kalandraka. Na xornada do venres, 7 de outubro, María Alonso Seisdedos compartirá a mesa redonda "1922, el año mágico: Joyce, Woolf, Proust" con Valèria Gaillard, tradutora ao catalán; Itziar Hernández Rodilla, tradutora ao castelán. O mesmo día na mesa redonda "La librería sin librerías: sobrevivir al cambio digital", participará Xosé Ballesteros xunto con Enrique Pascual, director de Librerías Marcial Pons e presidente do Gremio de Librerías de Madrid; Mireia Valencia, libreira de Finestres.

O Consello da Cultura tamén presente
Nun espazo compartido co Institut d´Estudis Catalans, o Consello da Cultura Galega estará presente tamén en LIBER, representado cunha vintena de publicacións que serven para dar conta do catálogo propio da institución. Entre elas hai títulos moi recentes como 'No desterro de Ramón Cabanillas', ou o 'Cancioneiro das loita galega', publicación conmemorativa do Día das Letras Galegas deste ano ou a segunda edición de 'O tempo das mareas. María Casares e Galicia', que afonda no vínculo galego da reputada actriz no centenario do seu nacemento. Ademais, no marco da Unión de Editoriales Universitarias Españolas, o CCG tamén ofrecerá cinco das súas últimas publicacións.