Paula Currás faise co XXXVIII Premio de Poesía Pérez Parallé

A trixésima oitava edición do Premio de Poesía Xosé María Pérez Parallé foi para Paula Currás. A autora nada en Cambre en 1996 impúxose neste galardón e levará o premio de 3.000 euros en metálico pola obra Vestiario. O volume será publicado na Colección de Poesía Espiral Maior.

Xosé Carlos Carracedo, Lucía Aldao e Silvia Pernas compuxeron o comité de selección desta xeira do certame. A entrega do premio que convoca anualmente o Círculo Mercantil e Industrial-Unidad de Fene realizarase o vindeiro sábado 22 de novembro na sede da entidade.

Currás, doutora en poesía norteamericana pola Universidade da Coruña (UDC), onde é profesora e investigadora, ten publicada obra poética en inglés e en galego, lingua na que obtivo o segundo premio de poesía Díaz Jácome e o Premio Xoán Díaz.