Muíño da Seca. Fonte: Turismo de Galicia.
Cóntallo a Cambados é o título da webserie que repasa a relación desta vila co mar a través dos testemuños da súa veciñanza e a partir do antigo muíño de mareas da Seca. O proxecto enmárcase na celebración dos 400 anos deste muíño de mareas, un dos poucos conservados en Galicia, e foi desenvolvida por O Faiado da Memoria co apoio do Concello de Cambados e o financiamento do GALP Ría de Arousa.
A partir do muíño e da súa contorna, persoas que desenvolveron a súa vida vencelladas ao mar lembran distintos aspectos da súa vida en catorce episodios, dos que catro xa están dispoñibles na rede. O resto dos capítulos iranse dando a coñecer ata o vindeiro 6 de outubro.
Este sábado 24 de setembro celebrouse no concello unha xornada de estudo e divulgación sobre este ben. No marco da mesma, diferentes especialistas na historia local concluíron que a estimación de que o muíño conta con 400 anos é incorrecta, e adían a súa construción ata finais do século XVIII e comezos do XIX.
A recente divulgación dun mapa que recolle a zona en 1794 revela que naquel entón no existía aínda a edificación actual. Canda a isto, o feito de que o actual muíño posúa varias moas específicas para moer millo non cadra co carácter marxinal que tiña este cultivo a comezos do século XVI.
O Concello anunciou a súa intención de solicitar fondos para desenvolver un proxecto de musealización do conxunto que permita pór en marcha a maquinaria do muíño.
