A Sociedade Antropolóxica Galega (SAGA) celebra estes 11 e 12 de marzo, a partir da seis da tarde, a décima edición das Xornadas sobre Entroido de Galiza. Co apoio do Concello de Pontevedra, o encontro desenvolverase no Convento de Santa Clara, recuperado en 2021 para uso público.
No programa presentaranse dúas publicacións monográfica sobre o Entroido de Doade e o de Nerga. Ademais haberá un relatorio sobre o de Sande e outro sobre o de San Mamede, que se reivindica como o punto de conexión entre felos e peliqueiros. O traballo do xornal O Sil a documentar o Entroido ourensán ao longo dos últimos 25 anos e mais as mascaradas ibéricas e as súas conexións completan as propostas desta xeira.
