A Real Academia Galega de Ciencias incorpora novos membros

A Real Academia Galega de Ciencias (RAGC) abriu o martes no Pazo de San Roque o curso académico coa incorporación de cinco novos membros da institución: María Soledad Soengas, Ana Cebreiro, Aníbal Ollero, Manuel J. Tello e Ángel Sanjurjo. Os membros proceden de ámbitos moi diversos: María Soledad Soengas é microbióloga especializada na loita contra o cancro de pel máis común, o melanoma. Ana Cebreiro é unha economista que traballa como responsable de Tributación Internacional no Banco Mundial. Aníbal Ollero é un enxeñeiro experto en robótica, Manuel J. Tello é catedrático de Física impulsor da candidatura para instalar en España a fonte europea de neutróns por espalación e Ángel Sanjurjo é director emérito do Stanford Research Institute.