Rodado coma unha viaxe entre Barbanza e Oporto, en Palabras de un desconocido Maneiro presenta unha viaxe tamén interior na que o músico faise acompañar do seu "demo interior", un Satanasiño interpretado por Aurelio Martínez, para afrontar os seus medos na procura dun crecemento interior. A presentación no formato videoálbum en redes pretende erixirse coma alternativa ante a incertiza de poder levar este traballo ante o público en concerto. Os temas de Maneiro, como é habitual nas súas composicións en solitario fóra de Heredeiros da Crus, son profundos e sentimentais, falando tanto de aspectos románticos coma vitais e fondamente sensibles nas súas letras. Neste caso ademais escóllese unha aproximación bastante acústica e cálida en xeral, que xa se vía en discos anteriores, o que dota a este Palabras de un desconocido dunha ambientación nostálxica coma liña xeral musical mentres que a parte de imaxe é alegre e vitalista. A produción musical está a cargo de Perfecto Mariño, en La Poza del Kuervo, que tamén fai guitarras e coros. Ademais Maneiro está acompañado na gravación por Cayetano Sánchez (guitarras), Pachi Cruz (baixo) Antonio Bermo (piano), Joao Machado 'Pony' (guitarra portuguesa), Rosendo Torres (trompeta), Manu Rey (percusión) e os coros de Margarita Loureda e Ángela Suárez.
