O sector da escena rexeita a decisión de manter Ourense sen programación cultural municipal

Trece diferentes entidades asociativas do sector cultural, principalmente das artes escénicas e musicais, asinan un comunicado conxunto de rexeitamento sobre a decisión do goberno municipal de Ourense de manter pechado o auditorio da cidade a toda a programación desde o inicio do ano e ata o presente día. En relación con este mesmo tema o Pleno do Concello de Ourense votou xusto fai unha semana unha moción non vencellante presentada polo PSOE para esixir un cambio radical nas políticas de cultura do goberno de Pérez Jácome e a renovación do convenio entre o concello e a Axencia Galega de Industrias Culturais da Xunta (AGADIC) para manter o Auditorio Municipal dentro da Rede Galega de Teatros e Auditorios (RGTA), convenio rexeitado polo alcalde. A moción foi aprobada cos votos de toda a oposición, incluíndo os concelleiros de Democracia Ourensana críticos co alcalde. Agora, sete días despois e sen cambios na política do consistorio, estas trece entidades amosan por medio deste comunicado o seu "total rexeitamento á decisión do Concello de Ourense de manter pechado o Auditorio Municipal da cidade dende comezos de ano, impedindo a programación de actividades culturais" e ven nese rexeitamento ao convenio da RGTA "unha clara declaración de intencións sobre non programar actividade nos vindeiros meses".

As asociacións máis importantes de Galicia en representación de músicos, empresas escénicas e de espectáculos musicais, intérpretes teatrais, técnicos de montaxe de espectáculos e profesionais do circo e os monicreques asinan este documento feito público hoxe sobre a xestión cultural en Ourense que vai acompañado dunha imaxe co frase :"Ourense tamén ten dereito á cultura". As asociacións entenden que a decisión do consistorio ourensán atende a unha xustificación política e non técnica, o que, segundo eles, "non ten cabida porque entra en conflito, primeiro, coa normativa vixente, e despois co dereito da cidadanía á cultura".

Os asinantes lembran que a normativa vixente no referente ás restricións derivadas da crise da COVID-19 non impide a programación de espectáculos, concertos ou calquera outra actividade de cultura ao vivo nos Concellos galegos e reivindican a boa praxe do sector cultural demostrada na seguridade destes eventos que se veñen facendo con todas as garantías e sen ningún tipo de altercado. Dende estas entidades representativas das empresas das artes do espectáculo e os seu traballadores rexeitase no comunicado “a determinación do equipo de goberno municipal de desatender a programación cultural da cidade”. Sinalan que a falta de colaboración do consistorio nese sentido "pon de manifesto a súa falta de sensibilidade -mais, por riba de todo, de interese- por achegar á cidadanía o abano de programación cultural que lle corresponde como dereito”. Sinalan o prexuízo causado por esta decisión unilateral á veciñanza ao privarlles da programación cultural, “impedindo así mesmo aos e ás profesionais do sector do espectáculo ao vivo o desenvolvemento normal da súa actividade, xa de por si moi afectada polos sucesivos peches do último ano".