Pradorúa, Olaxonmario e O cabalo de Alberte Merlo encabezan o palmarés de Youtubeir@s

A IV edición dos Premios Youtubeir@s deu a coñecer na mañá deste 9 de decembro os seus galardóns. Pradorúa foi recoñecida como a mellor canle polos seus "contidos variados, orixinais e de calidade”" que achegan "a ollada dunha muller nova cun enfoque moi actual". O mellor Youtubeir@ foi Olaxonmario, de quen o xurado destacou o seu "grande impacto" e o seu carácter "novidoso e orixinal". O terceiro dos grandes galardóns do certame, dotados con mil euros, foi o Premio ao Mellor Vídeo, que levou O cabalo de Alberte Merlo. O xurado valorou neste caso a "mestura da historia da literatura galega e os conflitos lingüísticos de Galicia" con grandes doses de retranca.



Dos outros recoñecementos que outorga o certame, dotados con cadanseus 500 euros, o Premio á Calidade Lingüística foi para As patacas do Paraíso, de Cativos na Cociña, o Premio Impacto levouno Xogando con Ana Pontón aos Sims, de Aquel-e con Olaxonmario, e o de Calidade Técnica obtívoo Antón Varela polo vídeo Os vinte de XX. Capítulo II. As Irmandades da Fala.

Éric Dopazo fíxose co Premio Comunicación polo seu traballo Un rapá transquilo, Darío Lago levou o Premio Creatividade pola canle O Son das Ideas, e o mellor vídeo musical foi Lume, de FØ Records. O Premio Didáctico recoñeceu o traballo de Naturiza, canle de Diego Ferraz, o de labor Pioneiro recoñece a canle Cousas rarismASMR, de Helena Antía López e o premio do público recibiuno Pablo Rodríguez Vila por Apps para docentes, de Titoriais para profesorado de Galicia.

O certame, está organizado polos servizos de normalización dos concellos da Baña, Ames, O Grove, Moaña, Ourense, Pontevedra, Ribadeo, Rianxo, Santiago e Teo, das universidades da Coruña, Santiago e Vigo e da Deputación da Coruña. A organización destacou a alta participación que se conseguiu nesta xeira, na que se recibiron 536 proxectos a concurso fronte aos 240 da anterior edición.