A Fundación Luis Seoane xa expón nas súas salas a exposición Escóitasme?, unha exposición do Laboratorio Seoane, que amosará ao público as propostas dunha serie de creadores e os traballos dos participantes no proxecto didáctico Laboratorio Escoitasme?, que se desenvolveu ao longo de 10 semanas durante o período de confinamento. No momento do peche forzado da institución decidiuse trasladar parte das actividades infantís da Fundación á unha plataforma online, de maneira que a rutina dos usuarios que ata entón adoitaban acudir aos obradoiros presenciais se vise afectada o menos posible. Así naceu Laboratorio Escóitasme?, un proxecto no que tres artistas diferentes propoñían cada semana aos participantes un reto relacionado co seu traballo e co universo creativo de Luis Seoane.
Coa obra do artista galego como fío condutor, a mostra, comisariada polos responsables do proxecto orixinal, Fermín Blanco e Silvia Longueira, recolle na sala principal da planta baixa da Fundación cada un dos retos lanzados polos artistas e os traballos que se elaboraron a partir destes. Ao longo de 52 sesións distribuídas en 10 semanas, elaboráronse un total de 25 retos, 3 eventos e un programa de radio nos que se experimentou co teatro, a pintura, a edición, a antropoloxía, a fotografía, a creación audiovisual ou a poesía, entre outros temas. Baixo a dirección do arquitecto Fermín Blanco e de Silvia Longueira, directora da Fundación Luis Seoane, a nova actividade chegou a contar con máis de trinta participantes e 24 creadores. A exposición poderá visitarse na Fundación Luis Seoane ata o vindeiro 21 de marzo de 2021.
A iniciativa conta ademais coa participación da Fundación María José Jove que incluíu na súa nova programación de visitas didácticas un percorrido especial sobre a obra de Luis Seoane. A visita á Fundación María José Jove permitirá coñecer tres obras orixinais de Luis Seoane: Bodegón- 1969; Mulleres- 1959 e Pulpo y jarra- 1961 cun guión de visita didáctica que falará acerca das linguaxes da arte, as vangardas pictóricas internacionais, españolas e galegas e, finalmente, contextualizará as obras de Seoane dentro dese mapa. A visita está formulada para comezala nunha das fundacións e continuala na outra, cun nexo, que son as obras de Seoane que a Fundación María José Jove ten na súa colección. Ambas institucións editarán, ademais, unha guía didáctica sobre as pezas de Luis Seoane que se reproducirán na presente exposición.
A iniciativa conta ademais coa participación da Fundación María José Jove que incluíu na súa nova programación de visitas didácticas un percorrido especial sobre a obra de Luis Seoane. A visita á Fundación María José Jove permitirá coñecer tres obras orixinais de Luis Seoane: Bodegón- 1969; Mulleres- 1959 e Pulpo y jarra- 1961 cun guión de visita didáctica que falará acerca das linguaxes da arte, as vangardas pictóricas internacionais, españolas e galegas e, finalmente, contextualizará as obras de Seoane dentro dese mapa. A visita está formulada para comezala nunha das fundacións e continuala na outra, cun nexo, que son as obras de Seoane que a Fundación María José Jove ten na súa colección. Ambas institucións editarán, ademais, unha guía didáctica sobre as pezas de Luis Seoane que se reproducirán na presente exposición.
