O CDG levanta o pano coa estrea da coprodución 'Crónica dunha heterosexual insatisfeita'

Aínda que nun principio se barallara a posibilidade de retomar a actividade escénica do Centro Dramático Galego dentro da Fase 3 da desescalada, finalmente houbo que agardar ata a “Nova normalidade” e a fin do Estado de Alarma. Será o vindeiro 4 de xullo cando se volva a levantar o pano do Salón Teatro en Santiago, sede do CDG, para volver a ver teatro neste espazo de titularidade autonómica que busca retomar a programación que quedou pendente. Será a estrea da obra Crónica dunha heterosexual insatisfeita, unha coprodución de Verdeveras Producións Artísticas e o CDG, a que iniciará esta nova etapa. As condicións de capacidade estarán limitadas ao 75% das posibilidades da sala, que serán 178 butacas por función. O Salón teatro volverá á actividade seguindo, tanto cara ao público coma a nivel interno, todos os protocolos e recomendacións das autoridades sanitarias, tantos nacionais coma europeos, e con atención á Guía de buenas prácticas para el reinicio de la actividad escénica y musical en España concertado entre o INAEM e as asociacións profesionais do eido artístico. A adaptación non requiriu levar cabo obras e os asentos non dispoñibles estarán deshabilitados, pero haberá a posibilidade de sentar xuntas a persoas que se declaren convivintes. Para a asistencia será obrigatorio o uso de máscaras e o local disporá de xel hidroalcohólico para o seu uso na entrada, así coma de felpudos hixienizantes.

A nivel escénico a atípica situación non terá impacto na obra que se estrea. Crónica dunha heterosexual insatisfeita é unha creación de María Ángeles Iglesias, na que ela mesma é a única intérprete sobre ás táboas. A proposta xira arredor dunha muller común, que ante o avance da idade decide facer cambios contra a parálise vital e as normas. Decide, entón, concretar unha fantasía e convidar ao público para que sexan testemuñas do seu gran momento. Esta obra convídanos a reflexionar sobre normas ou parámetros pre-establecidos que facemos propios sen pensar se hai unha opción diferente que teña máis que ver con nós mesmas. Aborda temas como a sexualidade, a parella, os soños e as frustracións, os desexos e as fantasías dunha muller que se anima a probar algo diferente, a "ser" da maneira máis completa e diversa posible reivindicando o seu dereito ao pracer. En tanto creación artística, a intención é poñer luz sobre iso que está oculto, conmover e xerar espazos para a reflexión coa contundente ferramenta do humor. A rotura da "cuarta parede" é unha das características deste espectáculo que ademais estará complementado coa exposición SuperheroinaS de cinco obras de artistas plásticas no espazo de ambigú. Nun exercicio de sororidade mutuo entre a dramaturga e as artistas, as ilustradoras Xoana Almar (Cestola na Cachola), Rebe Cierto, Alejandra Lorenzo, Cristina G. Cao e Raquel Germade crearon cadansúa obra inspiradas pola propia obra. As representacións terán lugar o día 4 de xullo ás 20:30 horas e o 5 de xullo ás 19:00.