Os Premios Frei Martín Sarmiento dan a coñecer os seus gañadores

A Rede de Escolas Católicas de Galicia deu a coñecer este 28 de maio as obras que o seu alumnado seleccionou como galardoadas no XVI certame literario Frei Martín Sarmiento. A Casa do Terror de Xoán Curiel foi a escolleita en 1º e 2º de primaria, mentres María Reimóndez, "coa súa obra O xeito das froitas conseguiu engaiolar o alumnado de 3º e 4º de Primaria coa súa achega a outros xeitos de vivir desde a esperanza, o humor e a fantasía", segundo explica a organización. David Daniel e o seu Brian, o chinés foi seleccionado polo alumnado de 5º e 6º de primaria.

Na categoría cuarta, de 1º e 2º ESO, a obra escolleita foi a BD Novo Mundo. Isabel Zendán na expedición da vacina, de El Tío Ramón e publicada por Bululú. Elia Barceló, con O efecto Frankestein, venceu na quinta categoría, correspondente a 3º e 4º ESO, mentres o alumnado de bacharelato e público adulto seleccionou para a sexta O pasaxeiro 19 de Carlos Vila Sexto.

A organización deu xa a coñecer os traballos finalistas da décimo sétima edición, que se fallará no mes de abril de 2021.