Os mosteiros de Pontevedra fánse máis accesibles cunha guía propia e visitas virtuais

A Deputación de Pontevedra ven de presentar un novo produto turístico baseado na posta en valor do patrimonio provincial, en concreto dos recintos monásticos. A guía Mosteiros das Rías Baixas sae cunha tirada de 2.000 exemplares en galego, castelán e inglés, e se complementa con visitas virtuais con gafas VR (realidade virtual) tamén aos mosteiros da provincia. Na guía recóllese información sobre a historia, estrutura de construción, modo de vida, oficios, lendas e actividade económica dos seis conxuntos relixiosos máis importantes da provincia: mosteiro de San Lourenzo de Carboeiro en Silleda, de finais do século X; mosteiro de Santa María de Aciveiro en Forcarei, de 1135; mosteiro de Santa María de Armenteira en Meis, de mediados do século XII; mosteiro de San Xoán de Poio, do ano 942; mosteiro De San Salvador ou San Benito de Lérez, en Pontevedra, de finais do século X e mosteiro de Santa María de Oia, principios do século X.

A guía, que se cederá en préstamo nos mosteiros e se poderá adquirir no castelo de Soutomaior ou a través da plataforma de venda online castelodesoutomaior.com, presenta lendas como as da Ponte do Demo do mosteiro de Carboeiro, Ero de Armenteira ou o oso de Oseira e historias como as loitas contra a piratería no mosteiro de Oia, as neveiras do Candán, o aceite milagreiro de San Benitiño ou as recollidas na biblioteca do mosteiro de Poio. Xunto á guía Mosteiros das Rías Baixas, o Goberno provincial tamén vén de poñer en marcha unha visita virtual que se pode realizar a través da web turismoriasbaixas.com co apoio dunhas gafas de VR. As gafas estarán a disposición da cidadanía, de xeito totalmente gratuíto, nas oficinas do Palacete, do aeroporto de Peinador, do mosteiro de Armenteira e tamén dos Mosteiros de Carboeiro, Aciveiro, Poio, San Benitiño e Oia. Para a visita virtual o único necesario -asegurou a presidenta da deputación, Carmela Silva durante a presentación da guía- é un teléfono móbil, co que descargar un código QR ou ben visitar a web turismoriasbaixas.com, seleccionar o modo VR e introducir o móbil nas gafas.