O Encontro Galego de Ilustración da AGPI medra na súa 15 edición

Cando se fan quince anos da súa posta en marcha, o Encontro Galego de Ilustración que organiza cada ano a Asociación Galega de Profesionais da Ilustración (AGPI) aposta por medrar. Segundo apuntan os organizadores, "catorce anos despois, a ilustración está moito máis normalizada na nosa paisaxe cultural. O Encontro busca agora dar un paso adiante como cita pioneira en Galicia para os profesionais e dos amantes da ilustración gráfica". Como grande novidade, a cita amplíase dunha a dúas xornadas. O 28 de setembro o evento contará na súa primeira sesión con conferencias a cargo de Juan Díaz-Faes, Ana Galvañ e Miguel Galladro, que compartirán as súas experiencias neste oficio.



Para sábado 29, unha mesa redonda abordará a relación entre ilustración e industria téxtil en Galicia, con Pilar Marcó, Xurxo G. Penalta e David Pazo como Relatores. Un obradoiro a cargo de Miguel Gallardo, unha Ilustranoite de micropresentacións de proxectos de ilustración e mais unha festa de feche con sesión de Dj ilustrada completan as propostas.