Vista aérea do Penedo dos Lobos. Fonte: Romanarmy.eu
O achado de material militar no campamento romano de Penedo dos Lobos, en Manzaneda, acaba de adiantar a presenza militar documentada deste exército no noso país. A escavación que coordina o investigador do Instituto de Ciencias do Patrimonio (Incipit) do CSIC João Fonte atopou material militar romano, entre o que se atopan as chatolas das sandalias romanas e moedas acuñadas por Publio Carisio, legado do primeiro emperador Octavio Augusto durante as Guerras Cántabro-Astures, entre o 25 e o 22 a.C. Deste xeito, a orixe da fortificación estaría neste conflito, que permitiu ao Imperio Romano completar a súa conquista da Península Ibérica.
Segundo destaca o equipo de investigación, integrado no proxecto romanarmy.eu, este supón "un achado de gran relevancia histórica para coñecer os inicios da romanización neste territorio. Ata o momento, numerosos especialistas consideraban que a zona de Galicia estivera á marxe do conflito. Aínda que non é posible polo momento determinar cal era a misión do continxente militar de Penedo dos Lobos, os achados redefinen o coñecido sobre esta época e axudan a contextualizar unha presenza militar romana neste territorio que, á luz do descuberto polo colectivo romanarmy.eu e outros equipos de investigación nos últimos anos, é máis ampla e diversa do coñecido ata o momento".
