Os Cadernos de Compostela recuperan a historia esquecida da capital

Unha colección de publicacións divulgativas que recuperan episodios, personaxes e aspectos pouco coñecidos da historia da cidade. Esta é a proposta dos Cadernos de Compostela a colección que presentaba esta mañá a concelleira de acción cultural da capital, Branca Novoneyra. O proxecto, coordinado desde a empresa dehistoria, comeza con Compostela 1117, que aborda o conflito que se neste ano entre realeza, nobres, bispado e cidadáns e que determinou en boa medida a evolución da vila. A colección emprega un formato de cadernos ilustrados de entre 20 e 40 páxinas pensados para súa fácil comprensión por calquera tipo de público.

Nese sentido, Novoneyra lembrou que a nova colección quere repasar aspectos como as festas locais e tamén o pór o foco "no xeito en que a cidade se transformou a través dos conflitos e en como a poboación respondeu aos mesmos". Así, os seguintes números da colección, previstos para este mesmo ano, abordarán as revoltas estudantís de 1968, as festas dos diferentes barrios da cidade e, xa cara ao Nadal, a terceira entrega falará sobre a evolución dos desfiles, procesións e cabalgatas que se desenvolveron de xeito histórico na capital. A primeira entrega sae cunha tiraxe de 10.000 exemplares que se distribuirán en espazos culturais, mercados e centros de ensino entre outros lugares.