Identifican unha forma humana nas pinturas rupestres de Baleira

En agosto de 2017 saltou aos medios a noticia da descuberta de pinturas rupestres nunha cova do concello de Baleira (Lugo). Debido ás circunstancias xeolóxicas de Galicia, tanto a existencia de covas como a conservación das súas pinturas é un fenómeno moi pouco usual. Un equipo dirixido polo arqueólogo Carlos Rellón, da USC, realizou a primeira intervención científica na cova, asumida economicamente pola Xunta de Galicia. Entre os primeiros resultados, os especialistas determinaron que a cova ten once paneis de arte rupestre con motivos esquemáticos e un deles contén a figura dun antropomorfo en relevo. Segundo indicou Rellón, "combina o debuxo co gravado e pódese identificar a unha persoa cos brazos levantados". A escavación, que consistiu en tres sondaxes máis diferentes técnicas de documentación do sitio arqueolóxico, permitiu localizar mostras de cerámica, ferramentas ou ósos que aínda están en fase de estudo. Os investigadores teñen a hipótese de que se poida tratar dunha zona de enterramento.