O mundo da cultura segue a defender o MARCO cun manifesto

Nunha nova acción para defender o MARCO do desmantelamento do seu modelo artístico e cultural representantes da Asamblea MARCO#AsíNon fixeron onte visible nas instalacións do museo vigués a súa postura contraria ás decisións da alcaldía olívica sobre o futuro do MARCO. Máis de 500 artistas e representantes do mundo da cultura asinan o manifesto que onte se presentou e que se iniciou co rexeitamento por parte de 18 artistas a tomar parte na seguinte exposición deseñada desde o Concello para este espazo. Estas dezaoito sinaturas nun documento que lamenta á decisión do Alcalde de finiquitar o modelo museográfico desenvolvido pola dirección e equipo profesional do Marco, suspendendo así a autonomía de xestión que lle correspondía como Fundación de Interese Galego foi posteriormente apoiado por centos de persoas do mundo a arte e da cultura como onte se fixo público no MARCO. Os asinantes de MARCO #AsíNon ven imprescindible a recuperación da autonomía de xestión do centro, actualmente dirixido directamente desde a alcaldía sen dirección propia nin responsable de exposicións, así como a convocatoria da praza de dirección a través dun concurso público. Reclaman ademais a apertura dun proceso de diálogo para aclarar o futuro do museo de arte contemporánea. A rolda de prensa tivo que celebrarse na entrada do museo ao impedírselles a entrada á sala onde estaba convocada.