Entidades fan público o seu apoio ao MARCO como centro de arte contemporánea

Tanto a Facultade de Belas Artes da Universidade de Vigo como a asociación de Amigos do MARCO acaban de emitir sendos comunicados manifestando a súa oposición a que este centro de arte contemporánea vigués cambie de orientación nos seus contidos. Advirten isto varios meses despois de que o Concello de Vigo, en xuño, pasara a controlar o museo e que o seu director, Iñaki Martínez Antelo, estea a piques de abandonar a dirección do centro por vontade propia en novembro. A Facultade de Belas Artes solicita un "procedemento de concurso transparente e aberto para a nova dirección" e solicita que "non se abandonen as liñas de apoio á arte contemporánea". Na mesma liña coinciden a Asociación de Amigos do MARCO, quen solicita que se dea "información sobre os plans que afectan ao futuro do museo" e tamén advirten de que "pode correr serio risco de desaparecer como espacio profesional e independente dedicado á cultura e arte contemporánea". A asociación iniciou unha campaña de recollida de sinaturas de apoio.