Asociacións estatais do sector da arte amosan a súa preocupación polo MARCO

Un manifesto conxunto dos principais colectivos profesionais do mundo da arte a nivel estatal é a última mostra da preocupación do sector pola situación do Museo de Arte Contemporánea (MARCO) de Vigo. A Asociación de Directores de Arte Contemporánea de España, o Consello de Críticos de Artes Visuais, o Consorcio de Galerías, a Federación Estatal de Asociacións de Xestores Culturais, o Instituto de Arte Contemporánea, Mulleres nas Artes Visuais e a Unión De Asociacións de artistas de España asinan un escrito motivado polo "período de incertidume sobre o futuro" deste espazo logo da renuncia de Iñaki Martínez Antelo como director. Estes colectivos reclaman como prioritario "resolver o problema da baixa dotación orzamentaria que fai case imposible la viabilidade económica" do museo e a posta en marcha da selección da nova dirección, para a que solicitan un concurso público aberto e transparente que "garantice a independencia do proxecto ante as inxerencias do poder político", así como o seu funcionamento democrático.

O Museo, pola súa banda, continúa coa súa programación e abre este sábado 22 de abril ás doce e media da mañá o proxecto #SALÓN DO MARCO no seu espazo anexo. A iniciativa, coa que Fran García Quiroga se impuxo na convocatoria de proxectos para este espazo en 2017, configura este lugar "como un espazo recoñecible pola propia sociedade, como esa sala de estar dun fogar na que reunirse en torno a unha mesa ou sentarse no sofá e falar do devir e do cotía". Segundo explica a presentación do #SALÓN DO MARCO "este lugar para estar concíbese como un proxecto de mediación, experimentación e investigación colectiva que facilita o impulso de comunidades de aprendizaxe; considerando a mediación non como un proceso de explicación do que alí ocorre, senón como un dispositivo que procura tecer redes e xerar conexións".

A iniciativa acollerá ao longo dos vindeiros meses unha Clínica Colectiva de Proxectos, a investigación experimental "Vigo Rebelde, o Metal en loita" ou o Seminario Comúns e Cultura entre outras propostas de diálogo de experimentación colectiva.