Quiosco: Cadernos de Fraseoloxía Galega, número 18

O Centro de Investigación en Humanidades Ramón Piñeiro deixa de se editar en papel os Cadernos de Fraseoloxía Galega para facelo unicamente como recurso electrónico. Acaba de publicar o volume 18, no que se poden ler "un traballo sobre o kíkôngò (un idioma africano), da autoría de Dolors Català e Inocente Luntadila; outro sobre a viticultura no refraneiro galego, da man de Xesús Ferro Ruibal; un máis sobre os cinco refráns cataláns máis votados, feito por Joan Fontana i Tous; sobre unidades fraseolóxicas do portugués que teñen o bacallau como compoñente, de Ana Belén García Benito; e outro sobre fraseoloxismos da lingua alemá con compoñentes únicas, de Marek Laskowski", entre outros contidos. O volume é accesible en liña na ligazón inferior.


O volume conta ademais con cadansúa recensión de obras de Maria Conca e Josep Guia, Germán Conde Tarrío, Inmaculada Penadés, Mª Carmen Losada Aldrey, Alba Cid Fernández e Xurxo Fernández Carballido; así como de novas coas publicacións e congresos celebrados no ano 2016, 194 en total. Como novidade, ofrece a relación de teses e traballos de fin de grao e mestrado realizados arredor da fraseoloxía, testemuño de que que esta disciplina lingüística é cada vez máis importante nos estudos universitarios. Pecha o volume un balance que referencia a nómina dos 187 investigadores de 24 países que levan participando nos Cadernos de Fraseoloxía Galega desde o seu inicio.