A Coruña inaugura o Festi=, Festival de Artes pola Inclusión Cultural

Os proxectos seleccionados na primeira convocatoria Cultura Accesible e Inclusiva conforman o groso do programa do primeiro Festi=. Festival de Artes pola Inclusión Cultural. A Coruña acolle desde hoxe e ata o vindeiro 14 de decembro toda unha serie de actividades que procuran "Brindar iguais condicións de participación a todas as persoas que forman parte da nosa sociedade e que, por algunha razón física ou cognitiva vense privados do pleno goce dos seus dereitos", segundo explicou o concelleiro de Cultura, José Manuel Sande, na presentación da iniciativa.



O Ciclo de Lírica Inclusiva da Asociación de Amigos da Ópera da Coruña inicia no Centro Cívico dos Mallo as actividades, cun recital que tamén se poderá ver o vindeiro día 16 no de Monte Alto. Para o 23 está prevista a estrea do espectáculo Experimentadanza, da Asociación Diversos, na Casa da Auga, e entre o 28 e o 30 destes mes La Quinta del Arte impartirá un obradoiro de formación sobre cultura inclusiva. O 3 de decembro, Día Internacional das Persoas con Diversidade Funcional e Sensorial, concentra grande parte dos actos previstos no programa, con actuacións como as de Guadi Galego, Maria Fumaça, proxeccións, obradoiros ou o espectáculo Unhas gafas como as do avó, de Caxoto. En paralelo ao evento, ata o 15 de decembro está aberta a convocatoria para presentar proxectos á segunda edición da convocatoria Cultura Accesible e Inclusiva.