Comeza en O Porriño o IIIº Ciclo de cine 'Cans todo o ano'

Este domingo 22 de Outubro arranca na Sala Ingrávida de O Porriño o ciclo de cine “Cans todo o ano”, impulsado conxuntamente polo Festival de Cans e o CineClube Rebobina e esta sala. É a terceira edición deste ciclo de cinema que ten como obxectivo darlle maior visibilidade a filmes que contaron con poucas oportunidades de exhibición e promover unha programación estable de cinema máis alá das propias datas do festival. Todas as películas que se proxectarán teñen algún tipo de vínculo co Festival de Cans, a través de directoras e directores, produtores ou intérpretes. O ciclo desenvolverase ao longo de seis meses desde este mes de outubro ao mes de marzo, a razón dunha proxección cada mes, onde se contará coa presenza de directoras e directores das obras para que poidan estar en contacto directo co público.

Ás 19 horas dará comezo o ciclo coa proxección do documental musical Guitarra de palo, dirixido pola viguesa Andrea Zapata-Girau, directora tamén de Aava, a curtametraxe que levou o Premio do Xurado e o premio á mellor realización en Cans, e que se proxectará antes do documental. Guitarra de Palo é un documental sen diálogos, onde varios músicos son os protagonistas dunha singular conversa musical. Desde o guitarrista de flamenco Antón Jiménez ao jazzista e finalista dos Grammy Jerry González, pasando polo guitarrista Raimundo Amador, o frautista Jorge Pardo ou o contrabaixista Javier Colina. A seguinte cita será o domingo 12 de novembro, onde con motivo do 15 aniversario da catástrofe do Prestige, se recuperará o emotivo documental Mar de Fondo, dirixido por Daniel Guzmán, coñecido actor e triunfador nos Goya co filme A Cambio de nada. Este documental de Guzmán só foi proxectado por agora no último Festival de Cans. É un documental rodado nos mesmos días da traxedia, que estivo case 15 anos nun caixón ata que veu a luz en Cans. O documental conta con testemuñas como os escritores Suso de Toro e Manuel Rivas, o músico Julián Hernández ou o showman Gran Wyoming. Nswangi

A última cita do ano programada será o domingo 10 de decembro, coa proxección do traballo colaborativo Hoxe non é un soño, un traballo rodado por dez veciñas e veciños de Cans, baixo a coordinación do realizador Juanma Lodo. O filme, nacido a partir do traballo escolar do xoven Raúl Rodríguez, narra a emotiva vida de José Quintas Sánchez, veciño de Cans que se ve una obriga de emigrar de neno a Venezuela. As entradas para todos os filmes están xa a venda a 4,50 euros e poden adquirirse por venda anticipada na plataforma online ww.ticketea.com, no teléfono 986331622 ou na propia sala