Facilitar a análise da conformación de Santiago de Compostela como cidade literaria é o obxectivo o web Compostela Geoliteraria, que acaba de saír á luz. O novo espazo na rede xorde do grupo de investigación que dirixe o catedrático da USC Fernando Cabo Aseguinolaza e localiza na xeografía da cidade fragmentos de obras publicadas entre 1842 e 1926 de autores como Antonio Neira de Mosquera, que inaugura a representación literaria contemporánea de Compostela, Manuel Murguía, Rosalía de Castro, Emilia Pardo Bazán, Juan Armada y Figueroa, Ramón del Valle-Inclán, Alejandro Pérez Lugín ou Prudencio Canitrot. O web achega varios mapas e formatos interactivos que exploran espazos de acción, de proxección, cartografías do afecto ou cartografías da incertidume que convidan a ollar dun xeito diferente o contorno urbano e comprender o xeito no que se representou na literatura.
