O CGAC explora os discursos da arte estatal no proxecto [Ex]Posicións críticas

O Centro Galego de Arte Contemporánea abre a temporada 2017 cunha proposta ambiciosa. Esta tarde ás 20 horas abre as súas portas [Ex]Posicións críticas. Discursos críticos na arte española, 1975-1995, un proxecto que integra tres exposicións e un ciclo de debates. Así, ata o vindeiro 28 de maio poderán verse as exposicións Criterios interpretativos, Interpretacións críticas e Desprazamentos teóricos, que repasan "as que foron as liñas emerxentes máis significativas da crítica de arte mediante a revisión e relectura dunha serie de exposicións producidas neses anos". En concreto, recupéranse 11 mostras das que se recollen obras de artistas españois e material documental relacionado




A iniciativa, que dirixe o propio director do CGAC, Santiago Olmo e comisarían Armando Montesinos e Mariano Navarro, "pretende facer visible a existencia de criterios e interpretacións críticas que conformaron discursos e liñas teóricas diferentes, en ocasións con elementos compartidos e noutras claramente enfrontados, o que desmente así o lugar común de que no mundo da arte española non houbo un pensamento crítico". Durante o período tratado desenvolvéronse fondas transformacións no mundo da arte, co desenvolvemento de cuestións como "as problemáticas do mercado, a plena incorporación das mulleres ás prácticas artísticas, ou a nova figura do comisario de exposicións"


O proxecto complétase co ciclo Tentativas críticas, un ciclo de debates que culminará coa edición dunha revista. Dora García, Martí Manen, Isidoro Valcárcel Medina, Montse Badía, José Maldonado, Alberto Ruiz de Samaniego, Juan Navarro Baldeweg, Miguel Fernández-Cid ou Guillermo Pérez Villalta son só algúns dos nomes que participan nesta iniciativa, que se poderá seguir ata o vindeiro seis de maio.