O director artístico do Ourense Film Festival, Fran Gayo, debullou onte polo miúdo gran parte da programación desta 21ª edición, con especial atención nas dúas competicións da Sección Oficial -Iberoamericana e Óperas Primas-, e na deslocalización do OUFF, que tamén contará con espazos de proxección en lugares da provincia como Xinzo, Carballiño ou o Centro Penitenciario de Pereiro de Aguiar. O festival se desenvolverá do 28 de outubro ao 5 de novembro. Este ano como novidade apóstase por unha nova estrutura de contidos con dúas novas seccións competitivas (Iberoamérica e Óperas Primas) e especiais temáticos nos que o cinema galego estará representado por 17 títulos. Entre os datos a destacar desta edición -que conta cun orzamento total de 198.000€– atópanse a maior presenza feminina nos postos de dirección dos filmes da Competición de Óperas Primas fronte á masculina (indicando un cambio de tendencia coas novas xeracións), ou o feito de que todas as películas que aspiran aos premios serán estreas en España. Ademais, Gayo tamén desvelou os nomes dos integrantes do xurado que serán: Manu Yáñez, Miriam Reyes e Luis López Carrasco na Competición Iberoamericana, e Maialen Beloki, Felipe Lage e Miguel Valverde na Competición de Óperas Primas.
O 21º OUFF reestrutúrase e amplía o seu radio de alcance
A programación presenta cambios e novidades con dúas novas seccións competitivas
Galicia e os profesionais galegos terán tamén unha destacada presenza na programación do 2016, comezando polo filme inaugural, Santoalla, un documental estadounidense sobre o asasinato dun cidadán holandés veciño da devandita parroquiade Petín. En canto ás producións galegas ou dirixidas por realizadores galegos, o programa deste ano ofrécelle ao público un total de 17 longas e curtametraxes. Así, Angélica (una tragedia) , de Manuel Fernández-Valdés, e Manuel Vilariño. Ser luz, de José Manuel Mariño, exhibiranse na competición iberoamericana. Manifestos proxectará as curtas Jeanette, de Xurxo Chirro en colaboración co alumnado do IES Sangriña da Garda, e Montañas ardientes que vomitan fuego e Sin Dios ni Santa María, de Samuel M. Delgado e Helena Girón. Ademais, a sección Síntomas programa o documental de Ángeles Huerta Esquece Monelos, a película de Nely Reguera María (y los demás) e Verengo, de Víctor Hugo Seoane. E en Extramuros poderá verse El pozo, de Héctor Domínguez-Viguera; O rebelde, de Óscar Doviso; Pelerinaxes, de Simone Saibene; Share o no Share, de Juan José Hervella Rego; Visións de Xisela Franco e Beli Martínez; Nación de muchachos, de Javier Camino; e We The Media, de Héctor Carré. Pola súa banda, a artista e realizadora limiá María Ruido protagonizará un dos apartados Foco da carteleira con L’oeil Impérative e Le rêve est fini, mentres que Lois Patiño presentará a súa instalación Tempo vertical.
Do mesmo ámbito
Universos
Explorar o Universo desta nova
Descobre máis noticias relacionadas con OUFF, Cine, Ourense, Carballiño...
Claves
Entidades
Conceptos
