O Festival Noroeste Estrella Galicia entra nas grandes citas musicais do verán

O Festival Noroeste Estrella Galicia, antes Noroeste Pop Rock, ven de pechar e presentar o cartel da súa 30 edición coa confirmación de bandas da talla de Ocean Colour Scene, Freedonia e Triángulo de Amor Bizarro, que tocarán xunto a Editors no escenario da Praia de Riazor a fin de semana. Atrás quedaron edicións nas que tanto o contido como a propia existencia do festival estiveron en dúbida. Do 2 ao 7 de agosto, a gran cita musical coruñesa acollerá un total de 60 concertos de balde en nove escenarios urbanos da cidade. Máis da metade da súa programación, 38 das 60 bandas confirmadas, correrá a cargo de artistas galegos, converténdose nun gran escaparate da música galega independente e de calidade e confirmando a aposta do Goberno Municipal por apoiar e visibilizar aos artistas locais e dando un paso adiante en reforzar este festival como aposta de ocio cultural no verán coruñés.

Nomes como os de Julián Maeso, Lagartija Nick, Carmen Boza, Sex Museum, Niño de Elche, Neil Halstead, Howe Gelb, Niña Coyote eta Chico Tornado ou The Capaces completan un cartel ecléctico que en 2016 aposta pola diversidade e a calidade dos concertos. O 30 Noroeste Estrella Galicia ofrece ao público durante seis días de máis de 100 horas de directos. O Festival Noroeste Estrella Galicia ofrecerá unha fórmula mixta para o acceso aos espazos con aforo limitado -o Castelo de Santo Antón, con capacidade para 600 persoas, e a Igrexa das Capuchinas, cun aforo de 200 espectadores-, con sorteos para fans das bandas a través das redes sociais do Noroeste. Un total de 60 bandas e artistas inundarán de música nove escenarios espallados por sitios emblemáticos da cidade.