Premios que rachan xéneros. Os III Premios Martín Códax da Música amosan nomes de referencia e cuestionan os estilos

Cantautoras que levan premios pop. Nomes que semellan facerse imprescindibles no noso panorama sonoro. A reivindicación de espazos e faceres marxinais. A gala dos III Premios Martín Códax da Música deixa un palmarés variado e con varias sorpresas logo dunha gala que se consolida na axenda cultural galega. Descobre e escoita con nós os proxectos galardoados.

O sector musical galego reuníase onte no Pazo da Cultura de Pontevedra para entregar os seus premios. "A Panadaría Teatro cumpriu as expectativas e conduciron unha gala chea de momentos moi divertidos", explica Ramón Bermejo, voceiro da Asociación Músicos ao vivo, que organiza estes galardóns. "Saíu un evento moi bonito e respirouse moita máis ilusión entre os músicos pola celebración. Semella que medra o interese, que era o que se tentaba". Como fío condutor da proposta, a gala apostou por visibilizar a diversidade e a marxinalidade neste mundo. "Contamos con grupos como Xerock, formado por xente con discapacidades ou con Batuko Tabanka, composto por caboverdianas de Burela". Canda a elas, a trompetista Desirée Gómez e a percusionista Antía Figueroa amosaron "o papel cada vez máis importante das mulleres no mundo da música". Tamén se homenaxeou o papel dos músicos anónimos como Paco Barreiro. No entanto o momento máis emotivo "foi a entrega do Premio Honorífico a Antón Corral, con todo o auditorio posto en pé nun aplauso enorme", recoñece Bermejo. Ruptura de xéneros A falar dos premiados, algúns dos resultados amosan a dificultade de encadrar a música en xénero. Así, se xa había poucos cantautores a aspirar a premios nesta edición, co segundo posto entre os xéneros con máis presenza, estes infíltranse tamén noutras categorías. Deste xeito, Silvia Penide, encadrada polo xeral como cantora en solitario, foi quen gañou o premio na categoría de Pop e Indie. No entanto, tamén estes solistas sufriron interferencias nas súas filas. Guadi Galego abandonou no seu último traballo as referencias folk que veu manexando na súa carreira e apuntouse como cantautora nesta edicións dos premios. E gañou. "As liñas fronteirizas entre categorías ás veces son moi delicadas. A xente vaille engadindo ingredientes ás súas músicas que fan que poidan se mover dun estilo ao outro", sinala Ramón Bermejo. No caso de Silvia Penide "é un premio outorgado a alguén leva moitísimos anos a vivir en exclusiva para a música con moito esforzo". Sobre o galardón para Guadi Galego, apunta que "é unha marabillosa autora e compositora e demóstrao no seu último disco". Nomes propios O terceiro palmarés dos premios permiten xa apuntar unha serie de nomes propios que, en diferentes estilos, amosan a súa importancia no noso panorama musical. Así, este ano temos a Caxade a facer dobrete nos premios co seu proxecto en solitario e mais coa Orquestra Os Modernos. Segundo sinala Bermejo "era a terceira vez que se presentaba, e a primeira que resulta premiado. É inevitable que se repitan algúns nomes porque hoxe ninguén vive dun só proxecto". A repasar edicións anteriores, comprobamos que dous músicos que están a se facer imprescindibles nas galas son Guillerme Fernández e Xabier Díaz. Os dous resultaron premiados nas anteriores edicións polo seu traballo conxunto en Berrogüetto e mais en AcadaCanto. Nesta xeira, o primeiro recolleu o premio polo seu traballo con De Vacas e o segundo polo álbum coas Adufeiras do Salitre. Pola súa banda, Sokram consolídase como referente do hip-hop galego, e tamén recunca en solitario logo de ter levado o premio na primeira edición con Banda Dios Ke te Crew. En canto as músicas do mundo, semella incontestable a importancia da Banda Crebinsky, que se fixo co galardón desta categoría na primeira e na terceira edición. Sen disco A amosar que non cómpre ter disco editado para conseguir o recoñecemento da profesión, De Vacas continúa a súa meteórica carreira a se facer co premio na categoría de grupos vocais. Para o voceiro de Músicos ao Vivo, "é un exemplo deses grupos que aparecen no momento xusto cunha fórmula que funciona axiña. Era un premio bastante cantado porque hoxe están por todas partes", tal como amosa a súa elección para pór música á nova edición do Festival de Cans. Proximidade Tal e como apuntaban as candidaturas, os premios Organistrum á sala e ao festival amosaron o recoñecemento por parte dos músicos a proxectos de proximidade fronte a grantes eventos e salas de grande tamaño. Así, A Arca da Noe, un pequeno espazo de Vilar de Santos impúxose na primeira destas categorías, malia a non contar cun grande equipo nin un aforo importante. "Penso que se premiou o bo facer dunha persoa que se decidiu a abrir unha sala no rural a reivindicar este ámbito como un espazo onde facer música. En só ano e medio de traballo gañou o cariño e o respecto da profesión e amosou que se pode levar adiante un proxecto así. Agardamos que isto anime a que se abran outros espazos similares", explica Bermejo. De xeito similar, o galardón outorgado ao festival compostelán Feito a Man "agradece unha aposta de moitos anos pola música de aquí, por sacala a rúa e mesturala coa xente. Penso que todos os músicos do país pasamos por alí." De cara ao futuro, segundo explican desde organización "estamos aínda a asumir a resaca de onte e agora faremos balance. En principio, o reto para o vindeiro ano e que non fique ningunha cadeira baleira no Pazo da Cultura, aínda que este xa estaba practicamente cheo".