Dez localidades acollerán as representacións de Camiño Escena Norte en Galicia

Unha decena de espectáculos de teatro, danza e circo noutras tantas localidades compón a oferta que a sétima xeira de Camiño Escena Norte achega ao noso país este outono. O programa de intercambio escénico desenvólvese entre o 12 de setembro e o 26 de outubro en Galicia, Asturias, Cantabria, Euskadi, Navarra e A Rioxa.

Arzúa, Carballo, Foz, Negreira, Lugo, Outes, Ribadeo, Santiago de Compostela, Vilalba e Vimianzo acollerán as 10 funcións da propostas, que chegarán da man das compañías La Roca Producciones e Zigzag Danza (Asturias), El Tejo Producciones (Cantabria), NiMú (Euskadi), Led Silhouette (Navarra) e El Perro Azul (A Rioxa). Precisamente esta última comunidade incorpórase nesta xeira ao programa, ao que tamén se suma Negreira como sede.

Ademais das funcións foráneas, Camiño Escena Norte levará tamén aos outros territorios participantes as propostas galegas de Pérez & Fernández, coa montaxe Nanay de la China, Grupo Chévere, que representará Helen Keller, a muller marabilla? e Paula Quintas Cía, con Multiperspectivas#3. En total serán 18 espectáculos os que circularán polas 60 sedes que fan parte do itinerario de exhibicións do proxecto.

O Festival Internacional Outono de Teatro de Carballo (FIOT) de Carballo fai parte tamén desa iniciativa a través da sección Vieiros,que reúne diferentes eventos escénicos dos territorios participantes e que nesta ocasión contará tamén co Rincones y Recovecos e Danza Xixón (Asturias); o programa Movimiento en Red Cantabria; Bideart Zigoitia (Euskadi), e Festival Mute e o Festival Iberoamericano de Teatro da Rioxa (FITLO), ambos na Rioxa.