Edificio Fontán.
O edificio Fontán da Cidade da Cultura dispuña dun auditorio usado con frecuencia para eventos profesionais e académicos, pero a Xunta quere agora preparalo para acoller tamén espectáculos de teatro, danza e música. "Na situación actual ficaba pequeno", explicou Alfonso Rueda, presidente da Xunta. O investimento, dun millón de euros, "favorecerá un aforro en custes de produción ao reducir de xeito significativo a montaxe dos escenarios e estruturas efémeras empregadas agora para actividades na Cidade da Cultura", e que estiman que ficará amortizada nun prazo de cinco ou sete anos. A ampliación non restará espazo ao Centro de Artes Dixitais, que mantén o calendario previsto. O deseño da reforma contou co asesoramento do Centro Dramático Galego.
