Nace DramaturGA, a plataforma das autoras e os autores dramáticos galegos

O Salón Teatro acollía esta mañá a presentación de DramaturGA, a Asociación Galega de Dramaturxia. A nova entidade nace dunha vintena de autores de textos teatrais que se asocian para defender os seus intereses ante o que consideran "un borrado sistemático das voces de noso" dos escenarios teatrais. O colectivo preséntase cun manifesto no que denuncia a invisibilidade desta profesión e sinala que "por un lado, temos a maioría das compañías de teatro galegas a lles prestar máis atención ás novas voces procedentes do resto do Estado español que á autoría galega. Ao seu carón, as compañías de recente creación optan por linguaxes posdramáticas e creacións colectivas e visuais sen acolleren no proxecto a función da dramaturga, coma se non existise ese perfil profesional, ou como se as novas voces que se dedican á dramaturxia lles fosen impor unha linguaxe caduca e non contemporánea. Cando se decantaren por unha dramaturxia textual, a escolla dun texto por parte destas compañías privilexia, as máis das veces, as literaturas foráneas". Do mesmo xeito, o colectivo denuncia que o Centro Dramático Galego deixou de sevir de "plataforma e motor da dramaturxia", e reclama un espazo de diálogo con esta institución.

A presentación pública contou coa presenza dunha ducia de autores e autoras, con nomes como Zê Paredes, Roi Vidal, Carlos Labraña, Cándido Pazó, Ana Carreira, Paula Carballeira ou Carlos Santiago. No acto, os voceiros do colectivo sinalaron o bo momento para creación dramática que se dá na actualidade no noso país. Segundo reza o manifesto fundacional, "nin nos tempos das Irmandades da Fala, nin nos da xeración Abrente foron tantas as voces a se expresaren desde e para o teatro, nin foron tantas as persoas con mancheas de folios nas gabetas e centos de arquivos nos discos ríxidos".

O web do novo colectivo achega biografías e bibliografías dos seus asociados, información sobre o sector e pretende ademais servir de base para a edición de textos destes autores. Entre os contidos xa dispoñibles, destaca un Informe sobre a situación da Dramaturxia Galega, texto no que se denuncia o descenso continuado da presenza dos nosos autores teatrais sobre as táboas, mesmo no caso de textos premiados.