A esmorga da esmorga

"Contento cos resultados?". Do outro lado do teléfono escóitase unha sonora gargallada. "Esa é unha pregunta retórica?", contesta Ignacio Vilar, director de A Esmorga, a película galega e en galego que está obtendo os primeiros postos nas cartelerias dos cines galegos por segunda semana consecutiva. Xa van aló máis de 20.000 espectadores só en Galicia, superando ás grandes producións americanas, e a cifra segue a subir. Falamos con Vilar para coñecer as claves do éxito da Esmorga e o que nos ensina sobre o futuro do audiovisual galego.

Ignacio Vilar sabía onde se metía. Experto en longas campañas de marketing, este director ten un modelo propio de promoción moi persoal no que previamente á estrea en salas se realizan moitos pases con colectivos profesionais e no ámbito local. "Observaba que o público saía emocionado, saía tocado e despois o máis impresionante é que saían orgullosos. Sentían que competíamos con calquera cinematografía do mundo", comenta emocionado Vilar.

"Fixemos unha campaña de promoción moito máis grande que as películas norteamericanas", di Ignacio Vilar, "porque sabíamos o que temos". Así que a campaña promocional contou 10 días cos actores, un feito que é inusual, publicidade en autobuses e noutros medios, e colleitou un excelente impacto no público do cine. "Máis que o orzamento, unha película o que ten que ter é unha historia detrás, debe ser unha experiencia que viva o o espectador, unha experiencia que te sirva para a vida".

A través da rede de R, o equipo do filme conéctase por videoconferencia cos centros de ensino da comarca na que están a realizar a presentación e deste xeito realízanse presentación a todo tipo de públicos en simultáneo. Manexándose moi ben a proximidade, Ignacio Vilar aproveitou o caudal de coñecemento aprendido nas súas dúas cintas previas: Pradolongo e Vilamor, nos que a promoción do filme levábase de cidade en cidade e de vila en vila. O salto á simultaneidade e a 18 copias en salas comerciais é a innovación de Ignacio Vilar para A Esmorga.

Aprender máis sobre o espectador
Unha das curiosidades da estrea sinalada por Vilar é as sorpresas que está a dar o espectador. "Dicíanme que a película non ía funcionar en salas como Marineda City", comenta Vilar, "pero eu porfiei e a película conseguiu aplausos nesas salas. Por que? Temos prexuízos con respecto aos espectadores, pero pódese ver que unha película en galego pode chegar a un público que posiblemente non é galegofalante".

Cun gran éxito de crítica, para Ignacio Vilar A Esmorga é conseguir a "inmortalidade" para a obra de Eduardo Blanco Amor. "Creo que cada xeración, en todo, debe coller a testemuña da anterior. Iso é a inmortalidade", comenta o director. "O mesmo pasa coa lingua galega: ao usala estou perpetuando o que os meus devanceiros fixeron".

Vilar explica que A Esmorga pode ser un gran argumento para repensar as políticas públicas do audiovisual. "O 80% do diñeiro público destinado a audiovisual debería ir destinado a filmes rodados inicialmente en galego", afirma Ignacio Vilar, "porque A Esmorga demostra que o público acude ao cine cando lle interesa e o idioma non é tan importante nesa decisión. Nestes momentos hai moitos filmes pagados con diñeiro público galego rodados inicialmente en castelán".