5 pezas imprescindibles dos museos galegos

A Xunta publicou un novo web no que se poden coñecer mellor os museos de Galicia. Aproveitando que cada museo fixo unha selección de obras destacadas das súas coleccións, aproveitamos para presentarvos cinco pezas imprescindibles que visitar nos museos do país durante este verán.

1.Museo das Peregrinacións (Santiago de Compostela)



Santiago Peregrino
Pénsase que foi un dos últimos cadros pintados por Juan de Flandes, posiblemente para o retablo da Capela Universitaria de Salamanca. O naturalismo das faccións de Santiago é un componente resaltable desta composición que se encadra na escola pictórica hispano-flamenca.

2. Museo Arqueolóxico de Ourense



Tabula de Hospitalidade de Castromao (132 d.C.)
Trátase dun documento fundamental para a historia política da vella Gallaecia. 150 anos despois da conquista do noroeste peninsular das mans de Augusto e os seus legados, a táboa amosa o acordo político de hospitalidade entre os coelerni, o pobo galaico que habitaba na zona actual de Celanova, e o prefecto militar romano da Cohorte I dos Celtíberos.

3.Museo de Belas Artes da Coruña



Filliña. Francisco Asorey
Asorey foi un escultura decisivo do século XX galego, caracterizado pola súa atención ás tradicións populares galegas e o primitivo da súa estética. Para o Museo de Belas Artes, “destacara a revalorizaciónd un material tradicional da escultura galega como é a madeira policromadae a iconografía de tipos galegos”

4.Museo Massó (Bueu)



Escena nas profundidades mariñas. Urbano Lugrís (1948)
Este museo dedicado ao mar e á conserva é unha fascinante retrospectiva do papel económico do medio mariño para a sociedade galega, pero tamén conserva fascinantes obras de arte, como esta pintura de gran formato, unha das seis que decoraba o comedor das mulleres da fábrica.

5. Museo Pedagóxico de Galicia (Santiago de Compostela)



Pupitre
O Museo Pedagóxico atesoura unha importante colección de material pedagóxico que permite ver a evolución da escola e das técnicas de ensino desde o século XIX. Unha aula reconstruída ou pupitres coma este son parte desta colección que, para moitos, aínda é memoria viva.