Xurxo Salgado: "É importante que os cibermedios pequenos colaboren entre si para subsistir"

Galicia Confidencial é un dos pequenos cibermedios máis lonxevos da rede e este venres celebra o seu décimo aniversario. Faráo cunha mesa redonda na Facultade de CC. da Comunicación sobre a situación dos cibermedios en galego seguida dun concerto de música clásica. Entrevistamos ao seu director, Xurxo Salgado.

culturagalega.org: En que cambiou nestes dez anos Galicia Confidencial?

Xurxo Salgado: Cambiaron moitas cousas. Cando comecei, falar de Internet era como falar da República de Mongolia. Comezou sendo un proxecto persoal e rematou por ser un proxecto empresarial. Algúns pequenos blogs persoais están a convertirse en medios de comunicación. Se a xente se pon a facer o que realmetne sabe, é constante e o fai ben, pode ter un nicho de negocio na rede. No meu caso foi a información política, pero hai xente que pode facer o mesmo con moda, deporte ou con cociña. Hai que especializarse no teu contido e a partir de aí é medrar. Hoxendía, sen embargo, as versións dixitais dos principais medios xa son máis importantes que as edicións en papel.

culturagalega.org: Vós traballades cun tipo de fonte moi especializada, que son os políticos galegos. Como é a relación dos políticos con Internet?

X.S.: Os partidos políticos que non son parvos están adaptándose na nova realidade. Sen embargo, tamén é certo que neste país, a nivel político, séguese pensando máis no papel que no dixital. E non todas se comportan igual: algunhas están máis adaptadas á era dixital que outras. En todo caso, os políticos saben que xa hai un importante target de audiencia que xa non le o papel.

culturagalega.org: E como é o futuro de Galicia Confidencial?

X.S.:Pois agardo que sexa moi saudable. Estamos ampliando o medio para que non sexa só político. A nosa sección Galicia Tendencais defende unha cultura aberta ao mundo, con tendencias e gastronomía. E estámoslle a dar un pulo importante á sección de Deportes. Agardamos, ademáis, que nos vindeiros meses haxa máis novidades con outros contidos.

Debo dicir que isto, que este medio sexa rendible, foi posible grazas á colaboración dos pequenos medios de Internet. GC ten moita relación con outros medios como Quepasanacosta, Certo, Valmiñor.info... Esa colaboración foi moi frutífera para todos. O que está claro é que os medios pequenos de Internet deben colaborar entre si para subsistir.