Concellos galegos, asturianos e leoneses únense para investigar un escenario da conquista romana

A 1300 metros de altitude, entre os concellos de Candín (León) e Ibias (Asturias), un grupo de arqueólogos asturianos localizara hai uns anos un enorme recinto de 5,5 hectáreas que estimaran a nivel hipotético como un campamento romano, complementado con outro asentamento militar nun outeiro próximo, xa na zona galega de Navia de Suarna. Estes días, un equipo arqueolóxico do CISC dirixido por Javier Sánchez-Palencia e Almudena Orejas está a investigar o recinto e confirmaron arqueoloxicamente que se trata dun recinto campamental romano, se ben aínda non puideron precisar a cronoloxía do asentamento. Os concellos de Navia de Suarna (Galicia), Ibias e Candín xa confirmaron o seu apoio para investigar o conxunto de A Granda das Xarras (o investigado actualmente) e A Recacha (o recinto ubicado na parte galega) de xeito conxunto en vindeiras campañas.

Este tipo de campamentos foron habituais durante as guerras levadas a cabo por Roma contra os pobos do noroeste ibérico que culminaron coa derrota dos montañeses no 19 a.C., aínda que pode pertencer a décadas posteriores da posguerra.