Diego Blanco acada o IV certame de banda deseñada sobre teatro

As bases propuñan unha adaptación do terceiro capítulo da peza2132, de Roberto Vidal Bolaño (que fora editada no nº8 da Revista Galega de Teatro, cuxa editora convoca o galardón). A proposta “Esta é unha mensaxe do futuro, presten atención” de Diego Blanco López (Viveiro, 1981) foi a que resultou vencedora. O xurado, composto pola deseñadora gráfica Violeta Fernández, o escenógrafo e artista plástico Diego Valeiras e a dramaturga Vanesa Sotelo, destacou “a calidade artística da proposta, así como a capacidade de concreción e de síntese da historia”. Agora, Blanco López deberá realizar a adaptación completa do texto (12 páxinas e portada) e recibirá os 600 euros cos que está dotado o galardón máis a edición da obra.

Este ano o concurso tiña unha característica especial, xa que a falta de apoios obrigou a Asociación Cultural Bambalinas a convertelo en bienal. Con este, é xa o cuarto número da colección de banda deseñada sobre o teatro galego. As obras anteriores son Historia do teatro galego, con deseños de Hugo Santos e texto de Pedro P. Riobó; Doentes, de Brais Rodríguez Verde a partir do texto homónimo de Roberto Vidal Bolaño; -Hámster de Diego Campos a partir do texto homónimo de Santiago Cortegoso; e Belicosario, de JuanMolina a partir do texto homónimo de Manuel Lourenzo.