Crear un sistema de información xeográfica no que se recollan xeolocalizados os bens do patrimonio cultural de Galicia. Esta é a proposta que o Parlamento de Galicia lle fai á Xunta "co fin de facilitarlles os trámites aos propietarios de parcelas situadas en zonas protexidas, así como a prevención de posibles danos". A Comisión Cuarta de Eduación e Cultura do Parlamento de Galicia aprobaba onte por sete votos a favor, ningún en contra e cinco abstencións a proposición non de Lei presentada polo Grupo Parlamentario Popular neste sentido.
Segundo recolle o xornal dixital Crónica3 o deputado popular Vidal Martínez-Sierra sinalou na súa intervención ante a comisión a importancia de facilitar o acceso a esta información para evitar danos producidos polo descoñecemento da situación de elementos patrimoniais, ademais e facilitar o seguimento por parte da administracións de traballos en áreas sensibles.
O texto íntegro aprobado na Comisión é o seguinte:
"O Parlamento de Galicia insta a Xunta de Galicia a que desenvolva unha plataforma ou sistema de información xeográfica corporativa na que se inclúa unha capa específica de patrimonio cultural que permita coñecer a situación dos bens que o integran e poñer en relación a situación dos mesmos coa información derivada da ordenación territorial, da paisaxe, dos usos e cualificación urbanística do solo, e outros ámbitos territoriais protexidos, como os derivados da protección da Natureza, a costa ou o medio ambiente."
