A artista Ruth Montiel constrúe pequenas necrópoles megalíticas para denunciar a degradación da natureza galega

Intervención na Curota. Foto: Ruth Montiel Arias

No monte da Curota -o estremo máis meridional do Barbanza- alberga unha curiosa formación de dólmenes en miniatura dispostos en círculos concéntricos. Non é produto dunha estraña secta, senón unha iniciativa artística de land-art de Ruth Montiel chamada Cromlech, e que anteriormente tamén se realizou nunha franxa litoral de Palmeira. O obxectivo de Ruth Montiel é chamar a atención sobre "zonas naturais galegas danadas pola man do home".

A artista madrileña quere "implicar os habitantes mediante a realización dunha intervención natural baseada nas súas raíces culturais". O resultado son pequenas obras artísticas que encerran un valor numérico. Deste xeito, o cromlech do monte Curota xunta en círculos concéntricos a 1.910 dólmenes en miniatura en referencia ás 1.910 hectáreas queimadas nos últimos anos na serra do Barbanza. As figuras están dispostas de xeito circular e anular "en alegoría á purificación a través dos ciclos lunares".

En Palmeira, Ruth Montiel construíu a súa intervención tamén nunha zona sensible. "Unha construtora destrozou 173 metros cúbicos de monte virxe para realizar pisos na liña de praia que nunca se construíron". A necrópole en miniatura tamén dispón de 173 dólmenes.