Cando o Partido Popular gañou as eleccións anunciou un paquete de reformas de textos xurídicos que afectaban ao sector da comunicación, entre eles a da CRTVG (da que xa houbera intentos previos). Tralo coñecemento de que Partido Popular e PSOE de Galicia pactaran o texto da nova Lei dos Medios Públicos Audiovisuais, os traballadores responderon cunha convocatoria de folga. Hoxe é o primeiro día desa vaga de protestas que xustifican o parón en que o novo texto “deixa aberta a porta á privatización da CRTVG, ao despedimento de boa parte dos seus traballadores e traballadoras, e que ademais reforza o control político da información”.
Ás dez da mañá desenvolveuse unha concentración diante do Parlamento, lugar no que se aprobará a futura lei que afecta á televisión e radio pública do país e que converterá a actual CRTVG nunha Corporación. A folga convocada para hoxe “podería prolongarse durante unha semana completa se así o deciden as asembleas” asegura o manifesto difundido polo Comité Interempresas da Compañía de Radio Televisión de Galicia.
