O CGAC exhibe oitenta horas da mellor televisión emitida no mundo

Son 150 programas que se emitiron por televisión desde os anos setenta e que reproducen a artistas, filósofos e creadores falando da súa obra, da creación artística e do medio televisivo en si mesmo. Oitenta horas de gravación conforman o núcleo da exposición coproducida entre o CGAC e o MACBA (Museo de Arte Contemporánea de Barcelona) baixo o título Estades preparados para a televisión? que abre hoxe as súas portas. “A mostra pretende reflexionar entre a relación que hai entre dúas institucións como son a televisión e o museo” asegurou Miguel von Hafe, director do CGAC.

Unha entrevista que lle fan a Dalí na televisión americana, os silencios e comentarios que se producen nos fallos técnicos das emisións, programas nos participou xente como Gilles Deleuze, Michel Focault, Federico Fellini ou Andy Warhol fan parte deste proxecto. “A mostra percibe ver que a televisión mudou bastante nas últimas décadas, sobre todo desde os anos oitenta, co inicio da competencia e contraprogramación co nacemento das cadeas privadas” apuntou Miguel von Hafe. O proxecto conta con páxina web, conta en Twitter, unha publicación, un canal de vídeo Vimeo e o proxecto educativo Zero TV.

Spin off: Reixa
A exposición, adaptada para o espazo físico do CGAC, cos contidos que se exhibiron no MACBA non escolma ningún video galego (de televisión ou participado por artista). Por iso, o CGAC estreará no vindeiro mes de xuño unha pequena exposición que completará este proxecto centrado na polifacética figura de Antón Reixa. Músico, poeta, produtor de cinema e de televisión, Reixa terá un espazo propio que complementará este achegamento descritivo e analítico sobre o medio televisivo.